Plantun de Prouvènço

Pèr coumpara dos planto d'encò nostre

Brassica tournefortii & Aegilops cylindrica

Brassica tournefortii

Brassicaceae Cruciferae

Nom en français : Chou de Tournefort.

Descripcioun :
Lou caulet-de-Tournefort o moustardo-dóu-desert, trachis dins li sablo proche de la mar e dis oustau. Li fueio de la rouseto soun proun grosso e descoupado ; dounon d'èr à li de la ravanello. Li flour, jauno palinouso, soun pas bèn grosso (petalo < 7 mm), e li silico, acabado pèr un bè, fan de 3 à 7 cm emé de 0 à 2 grano.

Usanço :
Li jóuini flour podon èstre manjado, mai pas de trop que caupon de glucosinolate (subretout dins li grano e li racino) qu'empacho la fourmacioun di gloubihoun rouge.

Port : Grando erbo
Taio : 0,3 à 1 m
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Brassica
Famiho : Brassicaceae
Famiho classico : Cruciferae

Ordre : Brassicales

Coulour de la flour : Jauno
Petalo : 4
Ø (o loungour) flour : 1 à 1,5 cm
Flourido : Printems Ivèr

Sòu : Ca
Autour basso e auto : Pancaro entresigna
Aparado : Noun
Remarco : Planto de coustiero
Decèmbre à abriéu

Liò : Sablo de mar - Escoumbre e proche dis oustau
Estànci : Termoumediterran à Mesoumediterran
Couroulougi : Óurigino éurasiatico
Ref. sc. : Brassica tournefortii Gouan, 1773

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.